പൂഞ്ഞാർ: ശ്രീനാരായണ ഗുരുദേവന്റെ വിശ്വസാഹോദര്യ പ്രാർഥനാഗീതമായ ദൈവദശകത്തിന്റെ ആഗോള ആലാപനത്തിന്റെ ഭാഗമായി പൂഞ്ഞാർ മങ്കുഴി ആകൽപ്പാന്തപ്രശോഭിനി ശ്രീ സുബ്രഹ്മണ്യസ്വാമി ക്ഷേത്രത്തിൽ നടന്ന കൂട്ടപ്രാർഥന ഭക്തിനിർഭരമായി. ഗുരുദേവൻ പൂഞ്ഞാറിൽ സന്നിധാനം ചെയ്തതിന്റെ ശതാബ്ദി സ്മരണകൾക്ക് പ്രാധാന്യമേറുന്ന കാലയളവിൽ നടന്ന ആലാപനം ക്ഷേത്രത്തിന്റെ ആത്മീയ-ചരിത്ര പാരമ്പര്യത്തെ അനുസ്മരിക്കുന്ന സംഗമമായി.
ജർമനിയിലെ ശ്രീനാരായണ ഫോറം ഫോർ യൂണിവേഴ്സൽ ബ്രദർഹുഡിന്റെ നേതൃത്വത്തിൽ വിവിധ രാജ്യങ്ങളിലെ 10 ലക്ഷം പേർ ഒരേസമയം ദൈവദശകം പാരായണം ചെയ്യുന്ന ‘ഒരു ലോകം ഒരു പ്രാർഥന’ എന്ന ആഗോള പ്രാർഥനാ പരിപാടിയുടെ ഭാഗമായാണ് മങ്കുഴി ക്ഷേത്രത്തിലും കൂട്ടപ്രാർഥന സംഘടിപ്പിച്ചത്. വിശ്വമാനവികത, സാഹോദര്യം, ലോകസമാധാനം എന്നിവയുടെ സന്ദേശം ഉയർത്തിപ്പിടിച്ച ആലാപനത്തിൽ നിരവധി ഭക്തർ പങ്കെടുത്തു.
എസ്.എൻ.ഡി.പി യോഗം പൂഞ്ഞാർ 108-ാം നമ്പർ ശാഖയുടെ നേതൃത്വത്തിൽ ഒക്ടോബർ 25 ഞായറാഴ്ച വൈകിട്ട് ഇന്ത്യൻ സമയം 7.15-നായിരുന്നു ദൈവദശകം ആലാപനവും കൂട്ടപ്രാർഥനയും. എസ്.എൻ.ഡി.പി യോഗം മീനച്ചിൽ യൂണിയൻ ചെയർമാൻ സുരേഷ് ഇട്ടിക്കുന്നേൽ, കൺവീനർ ഉല്ലാസ് എം.ആർ., യൂത്ത് മൂവ്മെന്റ് കൺവീനർ അരുൺ കുളമ്പള്ളിൽ എന്നിവരുടെ നേതൃത്വത്തിലായിരുന്നു ആലാപനം. ശാഖാ ഭാരവാഹികളും അംഗങ്ങളും ചടങ്ങിൽ പങ്കെടുത്തു.
ലോകത്തിന്റെ വിവിധ ഭാഗങ്ങളിൽ ഒരേസമയം ദൈവദശകം ആലപിച്ച് മനുഷ്യരാശിയുടെ ഐക്യവും സമാധാനവും പ്രചരിപ്പിക്കുക എന്ന ലക്ഷ്യത്തോടെയാണ് ആഗോള പ്രാർഥനാ യജ്ഞം സംഘടിപ്പിച്ചത്. ജാതി-മത വ്യത്യാസങ്ങൾക്കതീതമായി ഗുരുദേവന്റെ മാനവിക ദർശനം ഉയർത്തിപ്പിടിക്കുന്ന കൂട്ടായ്മയുടെ ഭാഗമായി മങ്കുഴി ക്ഷേത്രത്തിലും പ്രാർഥന നടന്നു.
ശ്രീനാരായണ ഗുരുദേവന്റെ സന്ദർശനവും നിർദേശങ്ങളും പൂഞ്ഞാറിന്റെ ആത്മീയ-സാമൂഹിക നവോത്ഥാന ചരിത്രത്തിൽ നിർണായക സ്ഥാനമുള്ളതാണ്. 1927 ജൂൺ 7-ന് ഇടപ്പാടി ക്ഷേത്രത്തിലെ പ്രതിഷ്ഠാചടങ്ങിൽ പങ്കെടുത്തശേഷം പൂഞ്ഞാറിൽ എത്തി.
അന്ന് നിലവിലുണ്ടായിരുന്ന ഭജനമഠത്തിൽ ശ്രീ സുബ്രഹ്മണ്യ ഭഗവാനെ സങ്കൽപ്പിച്ച് വേൽ പ്രതിഷ്ഠ നടത്തുകയും ക്ഷേത്രത്തിന് ആകൽപ്പാന്തപ്രശോഭിനി ശ്രീ സുബ്രഹ്മണ്യസ്വാമി ക്ഷേത്രം എന്ന നാമകരണം നിർവഹിക്കുകയും ചെയ്തു. ക്ഷേത്രത്തിന്റെ സംരക്ഷണത്തിനും സമുദായത്തിന്റെ സംഘടിത മുന്നേറ്റത്തിനുമായി ഗുരുദേവന്റെ നിർദേശപ്രകാരം എസ്.എൻ.ഡി.പി യോഗത്തിന്റെ 108-ാം നമ്പർ ശാഖ സ്ഥാപിതമായി.
ഗുരുദേവന്റെ ആത്മീയ-സാമൂഹിക നവോത്ഥാന സന്ദേശങ്ങൾ പുതുതലമുറയിലേക്ക് പകരുന്നതിനും വിശ്വസാഹോദര്യത്തിന്റെയും ലോകസമാധാനത്തിന്റെയും പ്രാധാന്യം ഓർമിപ്പിക്കുന്നതിനും ദൈവദശകം ആഗോള ആലാപനം വേദിയായി. ഗുരുദേവ സ്മരണകളും മാനവികതയുടെ സന്ദേശവും ലോകസമാധാനത്തിനായുള്ള പ്രാർഥനയും ഒത്തുചേർന്ന ചടങ്ങ് അവിസ്മരണീയ അനുഭവമായി.
