ഈരാറ്റുപേട്ട: നവംബർ 6, 7, 8, 9 തീയതികളിൽ കോട്ടയത്ത് നടക്കുന്ന സിഐടിയു സംസ്ഥാന സമ്മേളനത്തോടനുബന്ധിച്ച് പൂഞ്ഞാറിൽ ഷട്ടിൽ ടൂർണമെന്റ് സംഘടിപ്പിച്ചു. സിഐടിയു ജില്ലാ ജോയിന്റ് സെക്രട്ടറി ജോയ് ജോർജ് ടൂർണമെന്റ് ഉദ്ഘാടനം ചെയ്തു.
സിഐടിയു പൂഞ്ഞാർ ഏരിയ സെക്രട്ടറി രമേഷ് ബി. വെട്ടിമറ്റം അധ്യക്ഷത വഹിച്ചു. സിപിഐഎം പൂഞ്ഞാർ ഏരിയ സെക്രട്ടറി ടി.എസ്. സിജു, പൂഞ്ഞാർ ലോക്കൽ സെക്രട്ടറി മധുകുമാർ, പൂഞ്ഞാർ ഗ്രാമപഞ്ചായത്തംഗം ഷിഹാബ്, സി.പി.എം ലോക്കൽ കമ്മറ്റി അംഗം സുരേഷ് കുമാർ എന്നിവർ പ്രസംഗിച്ചു.
സിഐടിയു സംസ്ഥാന സമ്മേളനത്തിന്റെ ഭാഗമായി നവംബർ 5 മുതൽ കോട്ടയം തിരുനക്കര മൈതാനിയിൽ വിവിധ അനുബന്ധ പരിപാടികൾ സംഘടിപ്പിക്കും.
തൊഴിലാളി പ്രസ്ഥാനത്തിന്റെ ചരിത്രവും പോരാട്ടങ്ങളും നേട്ടങ്ങളും പുതുതലമുറയ്ക്ക് പരിചയപ്പെടുത്തുന്നതിനായി ചിത്ര-ചരിത്ര പ്രദർശനം, പുസ്തകമേള, ചലച്ചിത്ര പ്രദർശനം, കലാപരിപാടികൾ, സെമിനാറുകൾ എന്നിവയാണ് ഒരുക്കുന്നത്. തൊഴിലാളികളുടെ പ്രശ്നങ്ങളും തൊഴിൽ മേഖലയിലെ സമകാലിക വിഷയങ്ങളും ചർച്ച ചെയ്യുന്നതിനും തൊഴിലാളി ഐക്യവും സംഘടനാ പ്രവർത്തനവും ശക്തിപ്പെടുത്തുന്നതിനും സമ്മേളനം വേദിയാകും.
നവംബർ 6 മുതൽ 9 വരെ നടക്കുന്ന സംസ്ഥാന സമ്മേളനത്തിന്റെ സമാപനത്തോടനുബന്ധിച്ച് നവംബർ 9ന് കോട്ടയത്ത് ഒരു ലക്ഷം പേർ പങ്കെടുക്കുന്ന മഹാറാലി സംഘടിപ്പിക്കും. പ്രതിപക്ഷ നേതാവ് പിണറായി വിജയൻ റാലി ഉദ്ഘാടനം ചെയ്യും. സമ്മേളനത്തിന്റെ പ്രചാരണാർഥം വിവിധ മേഖലകളിൽ അനുബന്ധ പരിപാടികളും സംഘടിപ്പിക്കുന്നുണ്ട്.
ഷട്ടിൽ ടൂർണമെന്റിൽ അഭിജിത്ത് രാജഗോപാൽ–വൈശാഖ് ഉണ്ണികൃഷ്ണൻ ടീം ഒന്നാം സ്ഥാനവും ഷിഹാബ് പി.യു– ജിജോ കെ കൊല്ലിയിൽ ടീം രണ്ടാം സ്ഥാനവും കരസ്ഥമാക്കി. വിജയികൾക്ക് സിഐടിയു പൂഞ്ഞാർ ഏരിയ സെക്രട്ടറി രമേഷ് ബി. വെട്ടിമറ്റം ക്യാഷ് അവാർഡും ട്രോഫിയും സമ്മാനിച്ചു.
