അരുവിത്തുറ: ഗംഭീരമായ ശിശുദിനാഘോഷ പരിപാടികളാണ് അരുവിത്തുറ സെന്റ് മേരീസ് എൽ.പി.സ്കൂൾ കുരുന്നുകൾക്കായി ഒരുക്കിയത്. വെള്ള വസ്ത്രം ധരിച്ചാണ് എല്ലാവരും തന്നെ സ്കൂളിൽ എത്തിയത്.
ചാച്ചാജി മത്സരത്തിൽ പങ്കെടുക്കാൻ ധാരാളം കുട്ടികൾ, കുട്ടിച്ചാച്ചാജിമാരായി വേഷമിട്ടാണ് എത്തിയത്. അരുവിത്തുറ സെന്റ് മേരീസ് നേഴ്സറി സ്കൂളിലെ കുരുന്നു കൾ അതിഥികളായി എത്തിയിരുന്നു.
കുട്ടിച്ചാച്ചാജിമാരും വെള്ള വസ്ത്രധാരികളും അണിനിരന്ന റാലി കൗതുകമായി. തുടർന്ന് നടന്ന യോഗത്തിൽ സ്കൂൾ ഹെഡ് മാസ്റ്റർ ശ്രീ. ബിജുമോൻ മാത്യു അധ്യക്ഷത വഹിച്ചു.
സെന്റ്. മേരീസ് നേഴ്സറി സ്കൂൾ പ്രധാനധ്യാപിക റവ. സി. ഡയാന ഉദ്ഘാടനം നിർവഹിച്ച യോഗത്തിൽ പി.റ്റി.എ. പ്രസിഡന്റ് ശ്രീ. ഷിനുമോൻ ജോസഫ് കുട്ടികൾക്ക് സന്ദേശം നല്കി. കുട്ടികളുടെ കലാവിരുന്ന് ആഘോഷങ്ങൾക്ക് കൊഴുപ്പു കൂട്ടി.
എല്ലാവർക്കും വേണ്ടുവോളം പായസം നല്കി ആഘോഷങ്ങൾ കൂടുതൽ മധുരതരമാക്കി. നേഴ്സറി സ്കൂളിലെ കുട്ടികൾക്ക് ഗ്രീറ്റിംഗ് കാർഡും സമ്മാനങ്ങളും നല്കിയാണ് യാത്രയാക്കിയത്.
