പൂഞ്ഞാർ: പൂഞ്ഞാർ മങ്കുഴി ക്ഷേത്രത്തിലെ പ്രതിഷ്ഠാ മഹോത്സവത്തോട് അനുബന്ധിച്ച് ശ്രീനാരായണവിഗ്രഹഘോഷയാത്രയ്ക്ക് ഭക്തി നിർഭരമായ സ്വീകരണം നൽകി. 30 ന് ശിവഗിരിയിലെ ഗുരുദേവ സന്നിധിയിൽ നിന്നുമാണ് ദേവവിഗ്ര ഹങ്ങളും സ്വർണ്ണ വേലും ഒപ്പം ദിവ്യജ്യോതിയും ഘോഷയാത്രയായി പൂഞ്ഞാറിലേയ്ക്ക് പുറപ്പെത്.
നാഗമ്പടം മഹാദേവക്ഷേത്രത്തിൽ എത്തുന്ന വിഗ്രഹഘോഷ യാത്ര അവിടെ വിശ്രമിച്ചതിനുശേഷം രാവിലെ പൂഞ്ഞാറിലേക്ക് പുറപ്പെട്ട ഘോഷയാമയ്ക്ക് വിവിധ സ്ഥലങ്ങളിൽ ലഭിക്കുന്ന സ്വീകരണങ്ങളേറ്റുവാങ്ങി ഉച്ചയോടുകൂടി ഇടപ്പാടി ആനന്ദഷൺമുഖ സ്വാമി ക്ഷേത്രസന്നിധിയിലെത്തിച്ചേർന്നു.
ക്ഷേത്രാങ്കണത്തിൽ നടക്കുന്ന സ്വീകരണ സമ്മേളനത്തിനുശേഷം ഘോഷയാത്ര പൂഞ്ഞാറിൽ വൈകിട്ട് 6.00 ന് ടൗണിൽ എത്തിച്ചേർന്ന ഘോഷയാത്ര ആയിരം പേർ പങ്കെടുത്ത താലപ്പൊലിയുടെയും വാദ്യമേളങ്ങളുടെയും അകമ്പടിയോടുകൂടി ക്ഷേത്രാങ്കണത്തിൽ ക്ഷേത്രം തന്ത്രി ബ്രഹ്മശ്രീ രഞ്ചു അനന്തഭദ്രത്തിൻ്റെ മുഖ്യകാർമ്മികത്വത്തിൽ ദേവവിഗ്രഹങ്ങൾ സ്വീകരിച്ച് യാഗശാലയിലേക്ക് എത്തിച്ചു.
ഗുരുദേവൻ വേൽ പ്രതിഷ്ഠ നടത്തി നാമകരണം ചെയ്ത പൂഞ്ഞാർ മങ്കുഴി ആകൽപാന്തപ്രശോഭിനി ശ്രീസുബ്രഹ്മണ്യസ്വാമി ക്ഷേത്രം പുനർ നിർമ്മിക്കപ്പെട്ട് പ്രതിഷ്ഠാ അക്ഷയതൃതീയ നാളായ 2024 മെയ് 10 വെള്ളിയാഴ്ച ഉച്ചതിരിഞ്ഞ് 12.46 നും 2.45 നും മദ്ധ്യേയുള്ള ചിങ്ങം രാശി മുഹൂർത്തത്തിലാണ് പ്രതിഷ്ഠാ ചടങ്ങുകൾ നടക്കും.
![](https://erattupettanews.com/wp-content/uploads/2024/02/talent-new-300x212.jpeg)
പൂർണ്ണമായും കൃഷ്ണശിലയിലും ഉത്തമവൃക്ഷങ്ങളുടെ ഉരുപ്പടികളിലുമായാണ് ക്ഷേത്രനിർമ്മാണം നടത്തിയിട്ടുള്ളത്. തൃപ്പാദങ്ങൾ നേരിട്ട് രജിസ്ട്രേഷൻ നമ്പർ നൽകിയ 108-ാംനമ്പർ എസ്.എൻ.ഡി.പി ശാഖായോഗമാണ് ക്ഷേത്രപരിപാലനം നടത്തിപ്പോരുന്നത്. ശ്രീമഹാദേവനും ശ്രീസുബ്രഹ്മണ്യ ഭഗവാനും തുല്യ പ്രാധാന്യം നിശ്ചയിച്ചുകൊണ്ട് രണ്ട് ശ്രീകോവിലോടുകൂടി നിർമ്മിച്ചിട്ടുള്ള ക്ഷേത്ര സങ്കേതത്തിൽ ഉപദേവതകളായി ശ്രീഭദ്രദേവിയുടെയും ശ്രീഗണപതി ഭഗവാൻ്റെയും പ്രതിഷ്ഠകളുമുണ്ട്.
ക്ഷേത്രസങ്കേതത്തിൽ പുതിയതായി നിർമ്മിക്കപ്പെടുന്ന ഗുരുദേവ ക്ഷേത്രത്തിലെ ഭഗവൽ പ്രതിഷ്ഠാ ചടങ്ങാണ് ആദ്യമായി നടക്കുന്നത്. കൃഷ്ണശിലയിൽ നിർമ്മിതമായ ഗുരുദേവ വിഗ്രഹം അത്യപൂർവ്വമായി മാത്രമാണ് കേരളത്തിൽ കാണാൻ കഴിയുക.
പൂർണ്ണമായും കൃഷ്ണശിലയിലും ഉത്തമവൃക്ഷങ്ങളുടെ ഉരുപ്പടികളിലുമായി നിർമ്മിക്കപ്പെട്ട് മുകൾഭാഗം ചെമ്പോല മേഞ്ഞിട്ടുള്ള ഗുരുദേവക്ഷേത്രം നിർമ്മിച്ച് സമർപ്പിക്കുന്നത് വേലംപറമ്പിൽ കുടുംബയോഗമാണ്. ക്ഷേത്ര സങ്കേതത്തിൽ ഈശാനകോണിലായി നാഗ രാജാവിന്റെയും നാഗയക്ഷിയുടെയും പ്രതിഷ്ഠകളോടുകൂടിയ സർപ്പസങ്കേതവും മനോഹരമായി തീർത്തിട്ടുണ്ട്. സർപ്പ സങ്കേതം സമർപ്പണമായി നിർമ്മിച്ച് നൽകുന്നത് കുളംമ്പള്ളിൽ കുടുംബമാണ്.
സർവ്വശ്രേഷ്ഠമായ മറ്റൊന്ന് ഗുരുദേവൻ പ്രതിഷ്ഠിച്ച എകമുഖവേലിനെ സങ്കല്പ ആവാഹനം നടത്തി, സുബ്രഹ്മണ്യ ഭഗവാൻ്റെ വിഗ്രഹത്തോടൊപ്പം പ്രതിഷ്ഠിതമാകുന്ന സ്വർണ്ണവേൽ പ്രതിഷ്ഠയാണ്. 10 നാൾ നടക്കുന്ന അനുഷ്ഠാന ചടങ്ങുകൾക്കൊടുവിൽ 10 (വെള്ളിയാഴ്ച) ഉച്ചതിരിഞ്ഞ് 12.46 നും 2.45 നും മധ്യേ ദേവവിഗ്രഹങ്ങളുടെ പ്രതിഷ്ഠാ കർമ്മം നിർവ്വഹിക്കപ്പെടും.
ശിവഗിരി മഠത്തിൽ നിന്നുമെത്തുന്ന പത്മശ്രീ ശ്രീമദ് വിശുദ്ധാനന്ദ സ്വാമികളുടെ മഹനീയ സാന്നിദ്ധ്യത്തിൽ ക്ഷേത്രം തന്ത്രി ബ്രഹ്മശ്രീ രഞ്ചു അനന്തഭദ്രത്തിൻ്റെ മുഖ്യകാർമ്മികത്വത്തിലാണ് പ്രതിഷ്ഠാ ചടങ്ങുകൾ നടക്കുന്നത്.
13 ന് പുലർച്ചെയാണ് നാലാം കലശത്തോടുകൂടിയ നടതുറപ്പ് മഹോത്സവം. അന്നേ ദിവസം തന്നെ, പുനർനിർമ്മിക്കപ്പെട്ട ക്ഷേത്രത്തിൽ ആദ്യ ഷഷ്ഠി പൂജയും കാര്യസിദ്ധിപൂജയും നടക്കും. 14 ന് ചൊവ്വാഴ്ച രാവിലെ 10 ന് ക്ഷേത്രസമർപ്പണ മഹാസമ്മേളനം നടക്കും. ശ്രീനാരായണ ഗുരുദേവൻ പേരിട്ട രണ്ട് മഹദ് വ്യക്തികൾ, സുശീലാമ്മയും, സ്വാത ന്ത്ര്യസമരസേനാനി എം. കെ. രവീന്ദ്രൻ വൈദ്യരും ചേർന്ന് നടത്തുന്ന ഭദ്രദീപ പ്രകാശന ത്തോടുകൂടിയാണ് സമ്മേളനം ആരംഭിക്കുന്നത്.
എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ ഉദ്ഘാടനം ചെയ്യുന്ന സമ്മേളനത്തിൽ മുഖ്യാതിഥിയായി എസ്.എൻ ട്രസ്റ്റ് എക്സിക്യൂട്ടീവ് അംഗം പ്രീതി നടേശൻ പങ്കെടുക്കും. എസ്.എൻ.ഡി.പി യോഗം വൈസ് പ്രസിഡൻ്റ് തുഷാർ വെള്ളാപ്പള്ളി മുഖ്യ പ്രഭാഷണം നടത്തും.
ക്ഷേത്രം തന്ത്രി ബ്രഹ്മശ്രീ രഞ്ചു അനന്തഭദ്രത്ത് അനുഗ്രഹ പ്രഭാഷണം നടത്തും. ആശംസകൾ അർപ്പിച്ചുകൊണ്ട് എസ്.എൻ.ഡി.പി യോഗം ദേവസ്വം സെക്രട്ടറി സന്തോഷ് അരയക്കണ്ടി, പൂഞ്ഞാർ എം.എൽ.എ അഡ്വ. സെബാസ്റ്റ്യൻ കുളത്തുങ്കൽ, എസ്.എൻ.ഡി.പി യോഗം മീനച്ചിൽ യൂണിയൻ ചെയർമാൻ സുരേഷ് ഇട്ടികുന്നേൽ, ഗ്രാമപഞ്ചായത്ത് പ്രസിഡൻ്റ് ജോർജ് മാത്യു അത്യാലിൽ, ജ്യോതിസ് മോഹൻ ഐ.ആർ.എസ്, ഗുരുവായൂർ ദേവസ്വം ബോർഡ് മെമ്പർ മനോജ് ബി. നായർ, ബ്ലോക്ക് പഞ്ചായത്ത് മെമ്പർ അഡ്വ. അക്ഷയ്ഹരി, വേലംപറമ്പിൽ കുടുംബയോഗം ചെയർപേഴ്സൺ മിനർവ്വമോഹൻ, ഗ്രാമപഞ്ചായത്ത് മെമ്പർ സജി സിബി, മുത്തൂറ്റ് ഗ്രൂപ്പ് എക്സിക്യൂട്ടീവ് ഡയറക്ടർ ബിജിമോൻ കെ. ആർ., അരുൺകുളംമ്പള്ളിൽ, എന്നിവർ സംസാരി ക്കും. ക്ഷേത്രപ്രതിഷ്ഠാമഹോത്സവത്തിൻ്റെ സ്വാഗത സംഘം ചെയർമാൻ എം, ആർ. ഉല്ലാസ് അധ്യക്ഷത വഹിക്കുന്ന സമ്മേളനത്തിന് ജനറൽ കൺവീനർ വി. എസ്. വിനു സ്വാഗതവും വൈസ് ചെയർമാൻ വി. ഹരിദാസ് കൃതജ്ഞതയും രേഖപ്പെടുത്തും.
മീനച്ചിൽ എസ്.എൻ.ഡി.പി യൂണിയൻ ഭാരവാഹികളുടെയും യുണിയനു കീഴിൽ വരുന്ന ശാഖാ യോഗങ്ങളിലെ ഭാരവാഹികളുടെയും സമീപ മേഖലയിലെ എസ്.എൻ.ഡി.പി യൂണിയൻ നേതാക്കളുടെയും തദ്ദേശസ്വയംഭരണ സ്ഥാപനങ്ങളിലെ ജനപ്രതിനിധികളുടെയും പ്രദേശത്തെ മുഴുവൻ ഹൈന്ദവ സംഘടനാ നേതാക്കളുടെയും പൊതു പ്രവർത്തന-സാംസ്കാ രിക നായകരുടേയും മഹനീയ സാന്നിദ്ധ്യം സമ്മേളനത്തിലുണ്ടാകും.