കോട്ടയം: അധ്യാപക വിദ്യാര്‍ത്ഥി അനുപാതം 1:40 എന്ന രീതിയില്‍ കണക്കാക്കി സംസ്ഥാനത്തെ സ്‌കൂളുകളില്‍ ജോലിചെയ്യുന്ന മുഴുവന്‍ അധ്യാപകര്‍ക്കും ഇടതുമുന്നണി സര്‍ക്കാര്‍ നിയമനാംഗീകാരം ഉറപ്പാക്കുമെന്ന് കേരള കോണ്‍ഗ്രസ് എം ചെയര്‍മാന്‍ ജോസ് കെ മാണി.
ആയിരക്കണക്കിന് അധ്യാപകരാണ് നിലവില്‍ ശമ്പളമില്ലാതെ സ്‌കൂളുകളില്‍ പഠിപ്പിച്ചുകൊണ്ടിരിക്കുന്നത്. ഇവര്‍ക്ക് ശമ്പളം ലഭിക്കുന്നതിനുള്ള സാങ്കേതിക തടസ്സങ്ങള്‍ പരിഹരിക്കുന്നതിനുള്ള നടപടികള്‍ സര്‍ക്കാര്‍ ആരംഭിച്ചിട്ടുണ്ട്.
ഹൈബ്രിഡ് വിദ്യാഭ്യാസ തലത്തിലേക്കുള്ള വലിയ പരിവര്‍ത്തനമാണ് ലോകത്ത് വിദ്യാഭ്യാസ മേഖലയില്‍ നടന്നുകൊണ്ടിരിക്കുന്നത്. വിദ്യാര്‍ത്ഥികളെ ജീവിതമെന്തെന്ന് പഠിപ്പിക്കുന്നതില്‍ നിന്നും അധ്യാപകരെ മാറ്റിനിര്‍ത്താനാവില്ല.
സംസ്‌കാരം സ്വഭാവത്തിലേക്ക് സന്നിവേശിപ്പിക്കുന്ന പ്രക്രിയ ക്ലാസ് മുറികളില്‍ മാത്രമാണ് നടക്കുന്നത് ലോകനിലവാരത്തിലേക്ക് നമ്മുടെ വിദ്യാഭ്യാസ മേഖലയെ മാറ്റുക എന്ന വെല്ലുവിളിയെ അതിജീവിച്ചെങ്കില്‍ മാത്രമേ പ്ലസ് ടു കഴിഞ്ഞ് വിദേശപഠനമെന്ന ചിന്ത വിദ്യാര്‍ത്ഥികളില്‍നിന്നും രക്ഷിതാക്കളില്‍നിന്നും മാറുകയുള്ളൂവെന്നും ജോസ് കെ മാണി ചൂണ്ടിക്കാട്ടി.
കേരള സ്റ്റേറ്റ് സ്‌കൂള്‍ ടീച്ചേഴ്‌സ് ഫ്രണ്ട് കെ എസ് എസ് സംസ്ഥാന സമ്മേളനം കോട്ടയം എം.റ്റി സെമിനാരി ഹയര്‍ സെക്കണ്ടറി സ്‌കൂളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഹൈടെക് സൗകര്യങ്ങളുള്ള സ്‌കൂള്‍ അന്തരീക്ഷമൊരുക്കി ലോകനിലവാരമുള്ള വിദ്യാഭ്യാസം നല്‍കുന്നതിനാണ് സര്‍ക്കാര്‍ പരിശ്രമികുന്നതെന്ന് മന്ത്രി റോഷി അഗസ്റ്റിന്‍ പറഞ്ഞു.
മികച്ച തയ്യാറെടുപ്പുകളുമായി ആത്മ വിശ്വാസത്തോടെ ഭാവി തിരഞ്ഞെടുക്കാന്‍ ഓരോ വിദ്യാര്‍ത്ഥിയെയും പ്രാപ്തമാക്കുന്ന മികച്ച പരിശീലനം നല്‍കുന്ന ഇടങ്ങളായി സ്‌ക്കൂളുകള്‍ മാറണമെന്നും അദ്ദേഹം പറഞ്ഞു.
പ്രസിഡന്റ് ടോബിന്‍ കെ. അലക്‌സിന്റെ അദ്ധ്യക്ഷതയില്‍ മന്ത്രി റോഷി അഗസ്റ്റിന്‍ മുഖ്യപ്രഭാഷണം നടത്തി.
ഗവ.ചീഫ് വിപ്പ് ഡോ.എന്‍. ജയരാജ്, തോമസ് ചാഴിക്കാടന്‍ എം.പി, എം എല്‍ എ മാരായ ജോബ് മൈക്കിള്‍ എംഎല്‍എ, സെബാസ്റ്റ്യന്‍ കുളത്തുങ്കല്‍ എംഎല്‍എ, സ്റ്റീഫന്‍ ജോര്‍ജ്, ജോസ് ടോം, ടോമി കെ. അലക്‌സ്, ബേബി ഉഴുത്തുവാല്‍, പ്രൊഫ ലോപ്പസ് മാത്യു, പി. രാധാകൃഷ്ണ കുറുപ്പ്, ഷൈന്‍ ജോസ്, ജോര്‍ജ്കുട്ടി ജേക്കബ്ബ്, പോരുവഴി ബാലചന്ദ്രന്‍, രാജന്‍ പൊഴിയൂര്‍, ജോബി കുളത്തറ, കെ.റ്റി. മെജോ, റെനിരാജ്, റോയി മുരിക്കോലി എന്നിവര്‍ പ്രസംഗിച്ചു.
