പാലാ: വേനല്‍ ചൂടില്‍ കുളിര്‍മയേകുന്ന തൊടുപുഴ-പാലാ – കോട്ടയം എ.സി. സര്‍വ്വീസിന് തുടക്കം കുറിച്ച് പാലാ ഡിപ്പോ.
ലോ ഫ്‌ലോര്‍ എ.സി ബസാണ് ക്രമീകരിച്ചിരിക്കുന്നത്. തിരക്കേറിയ സമയത്ത് വേനല്‍ചൂട് അറിയാതെ തണുത്ത അന്തരീക്ഷത്തില്‍ പാലായുടെ ചെയിനില്‍ ഒരു സുഖ യാത്ര ചെയ്യാം. ഫാസ്റ്റ് പാസഞ്ചറിനേക്കാളം അല്പം നിരക്ക് കൂടുതല്‍ ഈടാക്കും.
തിങ്കള്‍ രാവിലെ മുതല്‍ സര്‍വ്വീസ് ആരംഭിക്കും. രാവിലെ 6.40 ന് പാലായില്‍ നിന്നും തൊടുപുഴയ്ക്കും തിരികെ 7.55 ന് പുറപ്പെട്ട് 8.45ന് പാലായിലും 9.15ന് കോട്ടയത്തും എത്തും.ആകെ എട്ട് ട്രിപ്പുകളാണ് ഈ സര്‍വ്വീസില്‍ ഉള്‍പ്പെടുത്തിയിരിക്കുന്നത്. രാത്രി 8.55 ന് പാലായില്‍ അവസാനിക്കും.
ചന്ദനയ്ക്കാംപാറ സൂപ്പര്‍ എക്‌സ്പ്രസ്
എരുമേലി, മണിമല, കാഞ്ഞിരപ്പള്ളി, ഈരാറ്റുപേട്ട, പാലാ പ്രദേശവാസികളുടെ മലബാര്‍ യാത്രക്ക് കൂടുതല്‍ സഹായകരമാക്കും വിധം എരുമേലി – ചന്ദനക്കമ്പാറ സൂപ്പര്‍ എക്‌സ്പ്രസ്സ് എയര്‍ ബസ് സര്‍വ്വീസ് ആരംഭിച്ചു.
ഈ സര്‍വ്വീസ് ലഭിച്ചതോടെ പാലായില്‍ നിന്നും വൈകിട്ട് എറണാകുളത്തേക്ക് യാത്രാ സൗകര്യം ലഭ്യമായി. വെളുപ്പിന് ഉഴവൂര്‍, മരങ്ങാട്ടുപിളളി മേഖലയില്‍ ഉള്ളവര്‍ക്ക് പാലായ്ക്ക് യാത്രാ സൗകര്യവും ഉറപ്പായി.
കോവിഡ് കാലഘട്ടത്തില്‍ എരുമേലി ഡിപ്പോയില്‍ നിന്ന് തുടരാതിരുന്ന ഈ മലബാര്‍രാത്രി സര്‍വീസ് ഇപ്പോള്‍ യാത്രക്കാരുടെ നിരന്തരമായ ആവശ്യം പരിഗണിച്ചാണ് വീണ്ടും പുനരാരംഭിച്ചിരിക്കുന്നത്.
വൈകുന്നേരം 4.30 ന് എരുമേലിയില്‍ നിന്ന് ആരംഭിച്ച് മണിമല ഈരാറ്റുപേട്ട (5.50 പി.എം) പാലാ (6.20 പി.എം) എറണാകുളം (9.00 പി.എം.) കണ്ണൂര്‍ (4.15 എഎം) പയ്യാവൂര്‍ (5.45 എ.എം) വഴി ചന്ദനക്കംപാറയില്‍ രാവിലെ 7 മണിക്ക് എത്തിച്ചേരും.
തിരികെ വൈകിട്ട് 5.20 ന് ചന്ദനക്കംപാറയില്‍ നിന്ന് തിരികെ എരുമേലിക്ക് പുറപ്പെടുന്ന ബസ് പയ്യാവൂര്‍ (5.45 പി.എം) ശ്രീകണ്ടാപുരം, ചെമ്പേരി, തളിപ്പറബ്, കണ്ണൂര്‍ (8 പി.എം) ഗുരുവായൂര്‍, എറണാകുളം ( 3.30 എ.എം.), പാലാ ( 5.30 എ.എം.), കാഞ്ഞിരപ്പള്ളി ( 6.30 എ.എം.), മണിമല ( 6.45 എ എം.) വഴി പിറ്റേന്ന് രാവിലെ 7.30 ന് എരുമേലിയില്‍ എത്തിച്ചേരും.
മലയോര മേഖലയില്‍ നിന്നുള്ള മലബാര്‍ യാത്രക്കാര്‍ക്കും വിദ്യാര്‍ഥികള്‍ക്കും ഉപകാരപ്രദമായ ഈ സര്‍വീസ് പുനരാരംഭിക്കുവാന്‍ മുന്‍കൈയെടുത്ത അധികൃതരെ പാസഞ്ചേഴ്‌സ് അസോസിയേഷന്‍ ചെയര്‍മാന്‍ ജയ്‌സണ്‍മാന്തോട്ടവും യാത്രക്കാരുടെ കൂട്ടായ്മകളും അഭിനന്ദിച്ചു.
പുഷ്ബാക്ക് സീറ്റ് സൗകര്യമുള്ള എയര്‍ സസ്‌പെന്‍ഷന്‍ ബസ് ആണ് ഈ സര്‍വീസിനായി ക്രമീകരിച്ചിരിക്കുന്നത്.
